Toshkent davlat yuridik universiteti

Toshkent davlat yuridik universiteti (TDYU) yuridik kadrlarni tayyorlash bo‘yicha O‘zbekistonda tayanch  oliy o‘quv va ilmiy-uslubiy muassasa hisoblanadi. Universitet Prezidentimizning 2013 yil 28 iyundagi № PQ 1990-sonli “Huquqshunos kadrlarni tayyorlash tizimini yanada takomillashtirish chora-tadbirlari to‘g‘risida”gi qaroriga muvofiq Toshkent davlat yuridik instituti negizida tashkil etildi.

Oliygoh tarixi bizning davlatimizda milliy huquqshunoslik maktabining rivojlanishi va Xadicha Sulaymonova, Hojiakbar Rahmonqulov, Boris Blinder, Georgiy Sarkisyans, Shavkat Urazayev, Shoakbar Shoahmedov, G‘afur Abdumajidov, Ikrom Zokirov kabi ko‘zga ko‘ringan yetuk huquqshunos-olimlar hamda milliy huquqshunosligimizga katta hissa qo‘shgan boshqa ko‘plab huquqshunoslar nomlari bilan chambarchas bog‘liqdir.

Universitet o‘z faoliyatini mustaqil o‘quv va ilmiy-izlanish muassasasi sifatida boshlaganidan to bugungi kunga qadar ko‘p yillik an’analarni o‘zida saqlab kelgan holda, o‘quv jarayoniga yangi pedagogik texnologiyalarni faol tatbiq etmoqda, qonun chiqarish va qonun qo‘llashning dolzarb masalalari bo‘yicha fundamental va ilmiy izlanishlar olib bormoqda hamda jamiyatda huquqiy ong va huquqiy madaniyatni oshirishga qaratilgan keng qamrovli ma’naviy-ma’rifiy faoliyatni amalga oshirmoqda.

Toshkent davlat yuridik universitetining professor-o‘qituvchilari tarkibiga 192 kishi kiradi, ulardan 40 nafari fan doktori, 110 nafari fan nomzodlaridir. Universitet o‘qituvchilaridan 20 nafari professor, 78 nafari esa dotsent unvoniga ega. Professor-o‘qituvchilarning o‘rtacha yoshi 40 yoshni tashkil qiladi.
Hozirgi kunda Toshkent davlat yuridik universiteti tomonidan bakalavr, magistr va katta ilmiy xodim-izlanuvchilar darajasidagi mutaxassislar tayyorlanadi.

Toshkent davlat yuridik universitetida bakalavrlar 524100 –“Yurisprudensiya (faoliyat turlari buyicha)” ta’lim yo‘nalishi doirasida quyidagi mutaxassiliklar bo‘yicha tayyorlanadi (o‘quv muddati – 4 yil):

  1. Davlat huquqiy faoliyati;
  2. Fuqarolik huquqiy faoliyati;
  3. Jinoyat huquqiy faoliyati;
  4. Xalqaro huquqiy faoliyat;
  5. Tadbirkorlik huquqiy faoliyati (biznes huquqi).

Toshkent davlat yuridik universitetida magistrlar quyidagi mutaxassisliklar bo‘yicha tayyorlanadi (o‘quv muddati – 2 yil):

  1. "Davlat boshqaruvi huquqi";
  2. "Soliq va bojxona huquqi";
  3. "Biznes huquqi";
  4. "Xalqaro tijorat huquqi";
  5. "Shartnoma huquqi";
  6. "Korporativ huquq";
  7. "Tabiiy resurslar huquqi";
  8. "Mehnat huquqi";
  9. "Jinoyat qonunchililigini qo‘llash nazariyasi va amaliyoti";
  10. "Sud ekspertizasi va kriminalistika".

TDYU tizimida O‘zbekiston Respublikasi Fanlar akademiyasining tugatilgan Falsafa va huquq instituti bazasida Huquqiy tadqiqotlar markazi tashkil etildi. Uning asosiy vazifalari etib quyidagilar belgilandi:

  • davlat hokimiyati va boshqaruvini yanada demokratlashtirishning huquqiy asoslarini takomillashtirish va rivojlantirish, fuqarolik jamiyatini shakllantirish, sud-huquq tizimini rivojlantirish, ijtimoiy-iqtisodiy bozor islohotlarini chuqurlashtirish, shuningdek, mamlakatda qonun ijodkorligi, huquqni qo‘llash, huquqni muhofaza qilish faoliyati sohasida fundamental va amaliy tadqiqotlar olib borish;
  • markaz tomonidan o‘tkaziladigan ilmiy tadqiqotlarga TDYU va respublikaning boshqa yuridik ta’lim muassasalari o‘qituvchilari, katta ilmiy xodim-izlanuvchilari va talabalarini keng jalb etish;
  • universitet, yuridik ta’lim muassasalarining o‘quv rejalari va dasturlariga joriy etish uchun Markaz tomonidan o‘tkaziladigan tadqiqotlar natijalari asosida yuridik fanlarni o‘qitish sifati va darajasini oshirishga yo‘naltirilgan ilmiy va o‘quv-metodik materiallarni ishlab chiqish;
  • davlat hokimiyati va boshqaruvi organlari, sudlar, huquqni muhofaza qiluvchi organlarning norma ijodkorligi, huquqni qo‘llash faoliyatida hamda ijtimoiy-iqtisodiy va ijtimoiy-siyosiy taraqqiyotning boshqa sohalarida foydalanish uchun yuridik fan va amaliyotning dolzarb muammolari bo‘yicha axborot-tahliliy materiallar va tavsiyalar tayyorlash.